ژونـد لــــیک

رولا (بي بي ګل) غني

د افغانستان اسلامي جمهوریت لمړۍ میرمن

د افغانستان د اسلامي جمهوریت لومړۍ میرمن جلالتمآب رولا (بي بي ګل) غني په لبنان هیواد کې زیږیدلي ده او د خپل خاوند جلالتمآب محمد اشرف غني د افغانستان اسلامي جهموریت ولسمشر سره یې د بیروت امریکایي پوهنتون کې سره ولیدل. دوی د ۱۹۷۵ کال د مارچ په میاشت کې سره واده وکړ چې له واده وروسته په کابل کې ژوند کاوه او وروسته بیا د زده کړو دوام لپاره د امریکا متحده ایالتونو ته ولاړل. د دوی د واده ثمره یو لور د مریم په نوم او یو زوی د طارق په نوم دي. 

کله چې مېرمن غني د امریکا متحده ایالتونو کې ژوند کاؤ، د ځینو ضمني دندو تر څنګ یې خپل وخت د خپلې کورنۍ د هوساینې په لاره کښې وقف کړی ؤ. همدارنګه یې د نړیوال بانک کورنۍ شبکې سره د نړیوال بانک د نوي کارمندانو د کورنۍ هرکلي په برخه کې د رضا کارې په توګه کار کړی دی. 

کله چې په ۲۰۰۲ کال کې افغانستان ته راستنه شوه، د کابل ټولنیزو ستونزو پوهیدلو ته لیواله شوه او خپله پاملرنه یې آشیانې ته واړوله چې د کابل د سړکونو بې وزلې ماشومانو لپاره یوه بې ګټې مرستندویه موسسه ده.

کله چې د ۲۰۱۴ کال د سپتامبر په میاشت کښې د هغې خاوند د افغانستان د اسلامي جمهوریت ولسمشر په توګه وټاکل شو، هغې د هیواد د لمړۍ میرمنې دنده په غاړه واخیسته. د همکارانو د یو کوچني ټیم په درلودلو سره غواړي چې یوه مثبته ټولنه رامنځته کړې چیرې چې د افغانستان هر وګړی خپله پیاوړتیا لاس ته راوړي او د هیواد د پرمختګ په لاره کښې فعاله ونډه ولري.

د ۲۰۱۴ کال را په دې خوا، مېرمن غني د خپل دفتر دروازه پرانیسته او په سلګونو هیوادوالو سره یې لیدنې ترسره کړي دي او ډېر تمرکز یې د ټولنې اړمن وګړي دي. لومړۍ مېرمن خپل ځان یوه اوریدونکې، تسهیل کونکې او ملاتړ کونکې بلي. هغه د بدلون لامل په توګه د ښځو او ځوانانو پر پیاوړتیا باور لري او تر دې دمه د هغوی پر لاسته راوړنو ویاړي. 

لومړۍ میرمن د ټولنیزې سولې او مسئول ښاروند مسلې ته وده ورکولو باندې په تمرکز سره په ملي کچه د خبرو اترو په پیل کولو کې مهم رول لوبولی دی. هغې، ښځې او ځوانان وهڅول چې د ویرې حاکمیت پر ځاي د قانون حاکمیت پلي کولو پروسې په اړه اقدام وکړي ، د تاوتریخوالي په ځای د منځګړیتوب او شخړې حل ته وده ورکړي، د ټولنې غړو ترمنځ متقابل احترام، او خپل چاپیریال که څه هغه کور وي او یا ټولنه، مسؤلیت په غاړه واخلي.

نوموړې خپلې زده کړې یې په کال ۱۹۶۹ کښې د پاریس ښار په I’Institut d’Etudes Politiques پوهنتون کښې د لسانس تر کچې پوري پاي ته رسولي. وروسته بیا په ۱۹۷۴ کال کښې د بیروت امرکایې پوهنتون څخه د سیاسې علومو په برخه کښې یوه ماسټري او بله ماسټري یې د نیویارک ښار د کولمبیا پوهنتون څخه په ۱۹۸۳ کال کښې د ژورنالیزم په برخه کښې لاسه ته راوړې.


رولا (بي بي ګل) غني

د افغانستان اسلامي جمهوریت لمړۍ میرمن